பணக்காரப் பெண்களுடன் டேட்டிங் சென்று உல்லாசத்தை அனுபவிப்பதுடன், பணமும் ஈட்டலாம் என்று ஆசை காட்டி, 72 வயது முதியவரை ஒரு கும்பல் மோசம் செய்துள்ளது. டேட்டிங் ஆசையில் அந்த முதியவர் சுமார் 60 லட்சம் ரூபாயை இழந்துள்ளார் என்பதுதான், மோசடியின் உச்சம்.
மகாராஷ்டிர மாநிலத்தின் புனே நகரில் 76 வயது முதியவர் ஒருவர் போலீசில் புகார் அளித்துள்ளார். அந்த புகாரின்படி, கடந்த ஆண்டு செய்தித்தாளில் விளம்பரம் ஒன்று வந்தது. அதில், பிரெண்ட்ஷிப் கிளப் என்ற பெயரிலான விளம்பர செய்தியில், தொலைப்பேசி எண் இருந்துள்ளது. அதனைத் தொடர்பு கொண்டு பேசிய முதியவருக்கு, அதிக வசதி படைத்த பணக்கார பெண்களுடன் டேட்டிங் சென்று பதிலுக்கு பணம் ஈட்டலாம் என பதிலளிக்கப்பட்டு உள்ளது.
இதற்காக முதியவர், கடந்த ஆண்டு மே மாதம் முதல் இந்த ஆண்டு பிப்ரவரி வரை ரூ.60 லட்சம் வரை பணம் அனுப்பியுள்ளார். உறுப்பினர் கட்டணம், பாதுகாப்புக்காக முன் வைப்பு தொகை இப்படி, பலக் காரணங்களைக் கூறி இந்த முதியவரிடம் இருந்து பணத்தைப் பறித்துள்ளது மர்ம கும்பல்.
இதை உணராதத் தாத்தா, டேட்டிங் ஆசையில், குறிப்பிட்ட வங்கி கணக்கிற்கு பணத்தை அனுப்பியுள்ளார். கடைசியில் மோசடி செய்திருப்பதை உணர்ந்த அந்த முதியவர், போலீசைத் தொடர்பு கொண்டு புகார் அளித்துள்ளார். இதன் அடிப்படையில் போலீசார் நடத்திய விசாரணையில், 28 வயது பெண் ஒருவர் கைது செய்யப்பட்டார். அவரது வங்கி கணக்கே பணபரிமாற்றத்திற்கு பயன்பட்டு உள்ளது.
தொடர் விசாரணையில் அனூப் மனோர் என்பவரைப் போலீசார் கைது செய்தனர். இந்த மோசடியில் வேறு சிலரும் ஈடுபட்டு இருக்க கூடும் என்ற சந்தேகத்தில் போலீசார் அவரிடம் துருவித் துருவி விசாரணை மேற்கொண்டு வருகின்றனர்.
மேலும் படிக்க...
மூத்தக் குடிமக்களுக்கான சிறப்பு டெபாசிட் திட்டம் நீட்டிப்பு- SBI அறிவிப்பு!