பயிர்களின் தரத்தை உயர்த்தும் பாசன நீரை பரிசோதிக்கும் வழிமுறை!

KJ Staff Updated on 2 February, 2021 5:49 PM IST

Irrigation — Credit : வேளாண்மை பொறியியல் துறை

பயிரின் வளர்ச்சிக்கு மண் பரிசோதனையைப் (Soil Test) போல பாசன நீர் பரிசோதனையும் அவசியம். நிலம் வளமானதாக இருந்தாலும், பாசனத்துக்கு பயன்படுத்தும் நீர் மோசமானதாக இருந்தால் மண்ணில் பயிர்கள் (Crops) பயிரிட தகுதியற்றதாக மாற்றி விடும். ஆகவே, பாசன நீரை பரிசோதிப்பது மிக அவசியம். விவசாயிகளுக்கு உதவும் வகையில் பரிசோதனைக்கான சில வழிமுறைகளை இங்கு பார்ப்போம்.

பரிசோதிக்க தண்ணீரை எடுக்கும் முறை:

பம்ப்செட் (Pumpset) உள்ள கிணற்றிலிருந்து நீர் பரிசோதிப்பதாக இருந்தால் மோட்டாரை அரைமணி நேரம் ஓடவிட வேண்டும். கிணற்றின் நடுவில் இருந்து ஒரு லிட்டர் பாட்டிலில் தண்ணீர் நிரப்ப வேண்டும். சுத்தமான பாட்டிலில்இதே தண்ணீரால் கழுவிய பின் பிடித்து பரிசோதிக்க வேண்டும். பம்ப்செட் இல்லாத கிணற்றில் மேல்மட்ட நீரை எடுக்காமல் ஆழத்தில் உள்ள நீரை எடுத்து பாட்டிலில் சேகரிக்க வேண்டும்.

20 ரூபாய் கட்டணம்:

பாசன நீர் மாதிரியுடன் விவசாயியின் பெயர் (Farmer Name), முகவரி, சர்வே எண், பயிர் சாகுபடி (Crop Cultivation), அலைபேசி எண் (Contact number) போன்ற விவரங்களுடன் மண் பரிசோதனை கூடம் (Soil Testing Laboratory) அல்லது வேளாண் அறிவியல் மையத்தில் கொடுக்க வேண்டும். நீரில் உள்ள உவர்நிலை (Salinity), களர் நிலை, கார்பனேட், பை கார்பனேட், சோடியம், குளோரைடு, சல்பேட் மற்றும் நீரின் கடினத்தன்மை, நீரின் ஈர்ப்பு விகிதம் (Gravity ratio of water) ஆகியவை பரிசோதிக்கப்படும். இதற்கு கட்டணம் ரூ.20 வசூலிக்கப்படுகிறது.

விவசாயிகள் பாசன நீரை பரிசோதித்துக் கொள்வது மிகவும் நல்லது. ஆகையால், மிகக் குறைந்த கட்டணத்தில் வேண்டிய நேரத்தில் பரிசோதித்துக் கொள்ளலாம்.