இருந்த நிலத்தையும் தானம் செய்த பிரதமர் மோடி- சொத்து மதிப்பு எவ்வளவு?

இந்தியப் பிரதமர் நரேந்திர மோடியின் சொத்து மதிப்பு குறித்த விவரங்களை பிரதமர் அலுவலகம் வெளியிட்டுள்ளது. இதன்படி அவருக்கு சொந்தமாக ஒரு வாகனம் கூட இல்லை.

பிரதமர் நரேந்திர மோடியின் சொத்து விவரங்கள் குறித்த அதிகாரப்பூர்வ தகவலை பிரதமர் அலுவலகம் வெளியிட்டுள்ளது. அதன்படி பிரதமர் மோடியின் சொத்து மதிப்பு 2.23 கோடி ரூபாய். இதில் பெரும்பாலான சொத்து வங்கி டெபாசிட் தொகையாகவே உள்ளது.

அசையா சொத்து

இதுபோக, பிரதமர் நரேந்திர மோடிக்கு அசையா சொத்துகள் ஏதும் இல்லை. குஜராத் தலைநகர் காந்திநகரில் இருந்த தனது நிலத்தை பிரதமர் நரேந்திர மோடி நன்கொடையாக வழங்கிவிட்டதாக பிரதமர் அலுவலகம் வெளியிட்டுள்ள தகவல் மூலம் தெரிகிறது.

முதலீடு

பங்குகள், மியூச்சுவல் ஃபண்ட், பத்திரங்கள் போன்ற சொத்துகளில் பிரதமர் நரேந்திர மோடி முதலீடு செய்யவில்லை. அவரிடம் 1.73 லட்சம் ரூபாய் மதிப்புள்ள நான்கு தங்க மோதிரங்கள் உள்ளன. இந்த சொத்து மதிப்பு விவரங்கள் கடந்த மார்ச் 31ஆம் தேதி வரையிலானவை.

ஒப்பீடு

கடந்த ஆண்டுடன் ஒப்பிட்டால் பிரதமர் நரேந்திர மோடியின் சொத்து மதிப்பு 26.13 லட்சம் ரூபாய் உயர்ந்துள்ளது. 2022 மார்ச் 31ஆம் தேதி வரை பிரதமர் நரேந்திர மோடியின் சொத்து மதிப்பு 2,23,82,504 ரூபாய் என பிரதமர் அலுவலகம் தகவல் வெளியிட்டுள்ளது.

சேமிப்பு

பிரதமர் நரேந்திர மோடி தபால் அலுவலக சிறு சேமிப்பு திட்டமான தேசிய சேமிப்பு சான்றிதழில் (National Savings Certificate) 9,05,105 ரூபாய் வைத்திருக்கிறார். 1,89,305 ரூபாய் மதிப்புள்ள ஆயுள் காப்பீடு பாலிசிகளும் வைத்துள்ளார். இதுபோக கையில் 35,250 ரூபாய் ரொக்கப் பணமும் வைத்திருப்பதாக பிரதமர் அலுவலகம் தெரிவித்துள்ளது.

மேலும் படிக்க...

தமிழ்நாட்டில் பழைய பென்சன் திட்டம்?

கத்திரிக்காயை பச்சையாக கடித்துக் காண்பித்த பெண் எம்.பி!