பருத்தி விலை மீண்டும் உயர்வு: மகிழ்ச்சியில் விவசாயிகள்!

நாமக்கல்லில் நடைபெற்ற பருத்தி ஏலத்தில் 3850 பருத்தி மூட்டைகள் ஒரு கேடியே 40 லட்ச ரூபாய்க்கு ஏலம் விடப்பட்டுள்ளது. நல்ல விலை கிடைத்துள்ளதாக விவசாயிகள் மகிழ்ச்சி தெரிவித்தனர். இவ்விலை தொடரவே வாய்ப்புள்ளதாக வியாபாரிகள் தகவல்.

பருத்தி விலை உயர்வு (Cotton price Raised)

நாமக்கல் வேளாண்மை உற்பத்தியாளர்கள் கூட்டுறவு விற்பனைச் சங்கத்தில் வாரம் தோறும் பருத்தி ஏலம் நடைபெற்று வருகிறது. இதில் நாமக்கல், தா.பேட்டை, பவித்ரம், துறையூர், கொளக்குடி, முசிறி உள்ளிட்ட சுற்று வட்டாரப் பகுதிகளில் இருந்து 150க்கும் மேற்பட்ட விவசாயிகள் 3850 பருத்தி முட்டைகளை விற்பனை கொண்டு வந்திருந்தனர்.

இந்த ஏலத்தில் ஆர்.சி.எச் ரகம் குவிண்டாலுக்கு ரூ.9009 முதல் ரூ.11899 வரையிலும், சுரபி ரகம் குவிண்டாலுக்கு ரூ.10689 முதல் ரூ.12169 வரையிலும், கொட்டு ரகம் குவிண்டால் 3016 ரூபாய் முதல் 9917 ரூபாய் வரையிலும் ஏலத்திற்கு விடப்பட்டது.

ஏலத்தில் 3850 மூட்டைகள் ஒரு கோடியே 40 லட்ச ரூபாய்க்கு ஏலம் போனது. கடந்த வார விலையை விட இந்த வாரம் குவிண்டால் ஒன்றுக்கு 2,000 ரூபாய் விலை உயர்ந்துள்ளதாக விவசாயிகள் கூறினர். கடந்த வாரம் ஆர்.சி.எச் ரகம் குவிண்டால் ரூ.9899 வரையிலும், சுரபி ரகம் குண்டால் ரூ.10599 வரை ஏலம் போனது. கடந்த ஜூன் மாதம் குவிண்டால் ரூ.13500 வரை விற்பனையான நிலையில் விலை வேகமாக குறைந்து மீண்டும் உயர்ந்துள்ளது மகிழ்ச்சி அளிப்பதாக விவசாயிகள் தெரிவித்தனர்.

இந்த ஆண்டு விளைச்சல் குறைந்து போனாலும் நல்ல விலை கிடைத்துள்ளதாக விவசாயிகள் மகிழ்ச்சி தெரிவித்தனர். இந்த ஏலத்தில் சேலம், மகுடஞ்சாவடி, திருப்பூர், ராசிபுரம், பல்லடம் உள்ளிட்ட பகுதிகளில் இருந்து வியாபாரிகள் கலந்து கொண்டு பருத்திகளை கொள்முதல் செய்தனர். மாசி பட்ட பருத்தி அறுவடை முடிவடையும் நிலையில் விலை தொடரவே வாய்ப்புள்ளதாக வியாபாரிகள் தெரிவித்தனர்.

மேலும் படிக்க

திருப்பூரில் நெல் நடவுப் பணிகள் தீவிரம்: விவசாயிகள் ஆர்வம்!

இந்த ஊர்ல தான் பால் விலை குறைவு: தெரிந்து கொள்ளுங்கள்!