8 மாவட்டங்களுக்கு அதிகபட்ச வெப்பநிலை எச்சரிக்கை- வெளியே செல்ல வேண்டாம் என அறிவுறுத்தல்!

Elavarse Sivakumar Updated on 4 April, 2021 1:19 PM IST

Maximum temperature warning for 8 districts- Advice not to go outside! — Credit : Tamil Webdunia

திருவண்ணாமலை உள்ளிட்ட தமிழகத்தின் 8 மாவட்டங்களில் 43 டிகிரி செல்சியஸ் அளவுக்கு வெப்பம் பதிவாகக்கூடும் என சென்னை வானிலை மையம் எச்சரிக்கை விடுத்துள்ளது.

இதுதொடர்பாக வானிலை மையம் வெளியிட்டுள்ள செய்திக்குறிப்பில் தெரிவிக்கப்பட்டிருப்பதாவது:

காற்றானது தெற்கு மற்றும் தென்கிழக்கு திசையில் இருந்து தமிழகப் பகுதிகளில் வீச வாய்ப்பு உள்ளது. இதன் காரணமாக கடலோர மாவட்டங்களில் அதிகபட்ச வெப்பநிலையானது 2 முதல்3 டிகிரி செல்சியஸ் வரை குறைய வாய்ப்பு உள்ளது.

அதிகபட்ச வெப்பநிலை முன்னறிவிப்பு (Maximum temperature forecast)

04.04.21 வரை

அதேநேரத்தில் திருவண்ணாமலை, தர்மபுரி, கிருஷ்ணகிரி, சேலம், ஈரோடு, கரூர், திருப்பத்தூர், வேலூர் மற்றும் திருச்சி மாவட்டங்களில், அதிகபட்ச வெப்பநிலையானது, இயல்பைவிட 4 முதல் 6 டிகிரி செல்சியஸ் அளவுக்கு உயரக்கூடும்.
இதன் காரணமாக இந்த மாவட்டங்களில் ஒருசில இடங்களில் அனல்காற்று வீசக்கூடும். எனவே பொதுமக்கள், விவசாயிகள், தேர்தல் வேட்பாளர், வாக்காளர்கள், போக்குவரத்துக் காவலர்கள் ஆகியோர், முற்பகல் 12 மணி முதல் பிற்பகல் 4 மணி வரை திறந்தவெளியில் வேலை செய்வது, ஊர்வலம் செல்வது போன்றவற்றைத் தவிர்க்குமாறு அறிவுறுத்தப்படுகிறார்கள்.
ஏனைய வட கடலோர மாவட்டங்களில்2 முதல் 4 டிகரி செல்சியஸ் வரை வெப்பநிலை உயரக்கூடும்.

05.04.21 மற்றும் 06.04.21

சேலம், ஈரோடு, நாமக்கல், கரூர், திருப்பூர், திண்டுக்கல் மற்றும் கோவையில் அதிகபட்ச வெப்பநிலையானது இயல்பைவிட 3 முதல் 4 டிகிரி செல்சியஸ் வரை உயரக்கூடும்.
இதன் காரணமாக, பொதுமக்கள் மற்றும் விவசாயிகள் முற்பகல் 12 மணி முதல் பிற்பகல் 4 மணி வரை திறந்தவெளியில் செல்வதைத் தவிர்க்குமாறு கேட்டுக்கொள்ளப்படுகிறார்கள்.
ஏனையக் கடலோர மாவட்டங்களில் 2 முதல் 3 டிகிரி செல்சியஸ் வரை உயர வாய்ப்பு உள்ளது.