உலகளவிலான பசுமை விருதை தட்டித் தூக்கிய சென்னை மெட்ரோ நிறுவனம்!

பசுமை உலக விருதுகள் 2023 அறிவிக்கப்பட்டுள்ள நிலையில், கார்பன் குறைப்பு பிரிவின் கீழ் சென்னை மெட்ரோ இரயில் நிறுவனம் வெள்ளி விருதினை வென்றுள்ளது.

லண்டன், யுனைடெட் கிங்டமில் உள்ள பசுமை அமைப்பிலிருந்து 2023 ஆம் ஆண்டுக்கான சுற்றுச்சூழல் விருதான பசுமை உலக விருது, சென்னை மெட்ரோ இரயில் நிறுவனத்திற்கு அறிவிக்கப்பட்டது. இதனைத் தொடர்ந்து ஏப்ரல் 24, 2023 அன்று அமெரிக்காவின் மியாமியில் நடைபெற்ற விழாவில் சர்வதேச பார்வையாளர்கள் முன்னிலையில் சென்னை மெட்ரோ இரயில் நிறுவனத்திற்கு சர்வதேச பசுமை உலக விருது வழங்கி கௌரவிக்கப்பட்டது. பசுமை உலக விருதுகள் கிரகத்தின் சிறந்த சுற்றுச்சூழல் விருது பிரச்சாரங்களில் ஒன்றாகும்.

பசுமை உலக விருது என்பது சென்னை மெட்ரோ இரயில் நிறுவனத்தின் அங்கீகாரம் மற்றும் சுற்றுச்சூழலில் அதன் நேர்மறையான தாக்கத்திற்கான அர்ப்பணிப்பைக் குறிக்கிறது என மெட்ரோ இரயில் நிர்வாகம் தெரிவித்துள்ளது.

விருது பெற்றது தொடர்பாக சென்னை மெட்ரோ இரயில் நிறுவனம் வெளியிட்டுள்ள அறிக்கையின் விவரம் பின்வருமாறு-

சென்னை மெட்ரோ இரயில் நிறுவனம் சுற்றுச்சூழலுக்கு உகந்த பல்வேறு முன்முயற்சிகள் மற்றும் ஒரு நிலையான மாதிரியை கொண்டு மெட்ரோ பயணிகளுக்கும், சென்னை மக்களுக்கும் நம்பகமான, வசதியான, பாதுகாப்பான மற்றும் விரைவான பயண அனுபவத்தை வழங்கி வருகிறது. அதே வேளையில் சுற்றுச்சூழலின் கட்டுமானம் மற்றும் செயல்பாடுகளின் போது சுற்றுச்சூழல் பாதிப்புகளைக் குறைப்பதை நோக்கமாக கொண்டுள்ளது. இதன் விளைவாக, சென்னை மெட்ரோ இரயில் நிறுவனம் ஆற்றல் திறன் மற்றும் நீர் மேலாண்மையை மேம்படுத்துவதில் பங்களிக்கிறது, அதாவது ஆற்றல் நுகர்வு, கார்பன் உமிழ்வு மற்றும் ஒட்டுமொத்த செயல்பாட்டுச் செலவுகளைக் குறைக்கிறது. இதையொட்டி, இந்த முயற்சிகள் பசுமை இல்ல வாயு உமிழ்வைக் குறைக்க உதவியது.

காற்றின் தரத்தை மேம்படுத்துதல், சுற்றுச்சூழல் வளங்களை பாதுகாத்தல், சூரிய சக்தியை அதிக அளவில் பயன்படுத்துதல் மற்றும் சுற்றுச்சூழலை மேம்படுத்த சுற்றுச்சூழல் ரீதியாக தோட்டங்களை உருவாக்குதல் போன்ற சுற்றுச்சூழல் முயற்சிகளிலும் சென்னை மெட்ரோ இரயில் நிறுவனம் கவனம் செலுத்தி வருகிறது.

அனைத்து விருது வகைகளிலும் கடினமான கார்பன் குறைப்பு பிரிவில் இந்த விருதை வெல்வதில் சென்னை மெட்ரோ இரயில் நிறுவனம் மேற்கொண்ட முயற்சிகளை நிகழ்ச்சி ஏற்பாட்டாளர்கள் பாராட்டினர்.

இந்த விருது, அரசு நிறுவனங்கள், அமைச்சகங்கள், தனியார் மற்றும் பொதுத் துறைகளில் உள்ள சமூகங்களை அங்கீகரிக்கும் வகையில் உலகளவில் மிகப்பெரிய சுற்றுச்சூழல் விருது பிரச்சாரமாக கருதப்படுகிறது. இந்த விருதுகள் உலகெங்கிலும் உள்ள சுற்றுச்சூழல் சிறந்த நடைமுறைகளை அங்கீகரிக்கவும் மற்றும் சுற்றுசூழலை மேம்படுத்தவும் பசுமை அமைப்பால் வழங்கப்படுகின்றன என்பது குறிப்பிடத்தக்கது.

pic courtesy : CMRL

மேலும் காண்க:

தீராத PF பாஸ்புக் பிரச்சினை- PF பேலன்ஸை காண 3 எளிய வழிமுறைகள் இதோ..