செய்திகள்

மீனவர்களுக்கும் விரைவில் கடன் அட்டை- மத்திய அமைச்சர் உறுதி!

Elavarse Sivakumar Updated on 29 October, 2021 8:21 PM IST

விவசாயிகளுக்கு வழங்கப்படும் கிசான் கிரெடிட் கார்டு' போல, விரைவில் மீனவர்களுக்கும் கடன் அட்டை வழங்கப்படும், என, மத்திய மீன் வளத் துறை இணையமைச்சர் முருகன் தெரிவித்துள்ளார்.

நேரில் ஆய்வு

தெலங்கானா மாநிலம் ஐதராபாதில் தேசிய மீன்துறை வளர்ச்சி வாரியத்தின் செயல்பாடுகளை, மத்திய இணை அமைச்சர் முருகன் ஆய்வு செய்தார்.

ஆய்வைத் தொடர்ந்து அமைச்சர் முருகன் செய்தியாளர்களிடம் கூறியதாவது:
விவசாயிகள் அவசர தேவைக்காகக் குறைந்த வட்டியில் கடன் பெறுவதற்கு கிசான் கடன் அட்டை வழங்கப்பட்டு வருகிறது. இந்தத்திட்டத்திற்கு அமோக வரவேற்பு கிடைத்திருப்பதுடன், விவசாயிகளின் நிதித்தேவை அவ்வப்போது பூர்த்தி செய்யப்படுகிறது.

மீனவர்களுக்கும் கடன் அட்டை (Credit card for fishermen)

மீனவர்களின் நிதிச்சுமையை எதிர்கொள்ள ஏதுவாக, விரைவில் மீனவர்களுக்கும் கடன் அட்டை வழங்கப்படும். இதனால் மீனவர்கள் பயன் பெறுவர். கடல்சார் உணவுப் பொருட்கள் ஏற்றுமதியை அதிகரிக்கவும், ஐந்து மீன்பிடித் துறைமுகங்களில் பதப்படுத்தும் பிரிவுகள், குளிர்சாதன கிடங்குகள் ஆகியவற்றை அமைத்து சர்வதேச தரத்திற்கு உயர்த்தவும் மத்திய அரசு திட்டமிட்டுள்ளது.