PM Kisan : உங்க அக்கவுண்ட்ல எவ்வளோ இருக்கு? இத பண்ணுங்க தெரிஞ்சிக்கலாம்!

Daisy Rose Mary Updated on 31 October, 2020 9:50 AM IST

பிரதமரின் கிசான் சம்மான் நிதி யோஜனா திட்டத்தின் கீழ் விண்ணப்பித்த விவசாயிகளுக்கு மத்திய அரசு தனது அடுத்த தவணை வழங்குதற்கான பணிகளை மேற்கொண்டு வருகிறது. இது வரை பணம் கிடைக்காதவர்கள், ஏழாவது தவணைக்காக காத்திருப்பவர்கள் தங்கள் விண்ணப்ப நிலையை ஆன்லைனில் அரசாங்கத்தின் அதிகாரப்பூர்வ இணையதளத்தில் சரிபார்த்துக்கொள்ளலாம்

PM-Kisan திட்டம்

விவசாயிகளின் நலனைக் கருத்தில் கொண்டு மத்திய அரசு பல்வேறு திட்டங்களை அமல்படுத்தி வருகிறது. இதில் முக்கிய திட்டமாக பிரதான் மந்திரி கிசான் சம்மான் நிதி யோஜனா திட்டம் (PM-Kisan) அமைந்துள்ளது. இந்த திட்டத்தில் இணைந்துள்ள விவசாயிகளுக்கு ஆண்டுக்கு ரூ.6000 வழங்கப்படுகிறது. ஒரு ஆண்டுக்கு மூன்று தவணையாக இந்த பணம் அவர்களின் வங்கிக் கணக்குகளில் நேரடியாக செலுத்தப்படுகிறது.

இந்த திட்டத்தின் 6-வது தவணையை மத்திய அரசு கடந்த ஆகஸ்ட் மாதம் விடுவித்தது. வரும் நவம்பர் மாதம் வரை இதற்கான விவசாயப் பயனாளர்களின் வங்கி கணக்கில் மத்திய அரசால் பணம் செலுத்தப்பட்டு வருகிறது. இந்நிலையில், அடுத்த தவணை வழங்குவதற்கான பணிகளையும் மத்திய அரசு மேற்கொண்டு வருகிறது.

பி. எம் கிசான் திட்டத்திற்கு விண்ணப்பித்து இது வரை பணம் கிடைக்காதவர்கள், ஏழாவது தவணைக்காக காத்திருப்பவர்கள் தங்கள் விண்ணப்ப நிலையை ஆன்லைனில் அரசாங்கத்தின் அதிகாரப்பூர்வ இணையதளத்தில் சரிபார்க்கலாம்.

பி. எம் கிசான் நிலை அறிய என்ன செய்ய வேண்டும்?

உங்களின் கணக்கு நிலை குறித்து அறிய முதலில் www.pmkisan.gov.in அதிகாரப்பூர்வ வலைத்தளத்திற்குச் செல்லுங்கள்

முகப்புப்பக்கத்தில் "Farmers Corner" என்பதைக் கிளிக் செய்க.
இப்போது ''Beneficiary status" என்பதைக் கிளிக் செய்க.
உங்களின் ஆதார் எண் / கணக்கு எண் / மொபைல் எண் ஆகிய மூன்று விருப்பங்களில் ஏதேனும் ஒன்றை உள்ளிடவும்
பிறகு "Get Data" என்பதை கிளிக் செய்க
இப்போது உங்களின் கணக்கு நிலவரங்களை பார்க்கமுடியும்.