வேளாண்மை மற்றும் விவசாயிகள் நல அமைச்சகத்தின் கீழ் இயங்கும் பொதுத்துறை நிறுவனமான தேசிய விதைகள் கழக லிமிடெட் (NSC), 2023-24 நிதியாண்டிற்கான இறுதி ஈவுத்தொகை ₹ 35.30 கோடியை, மத்திய வேளாண் அமைச்சர் ஸ்ரீ சிவராஜ் சிங் சௌஹானிடம் வழங்கினார் தேசிய விதைகள் கழக லிமிடெட் தலைவர். இந்த ஈவுத்தொகையானது அதன் நிகர மதிப்பில் 5% ஆகும்.
புதுதில்லியில் உள்ள கிருஷி பவனில் நேற்று (05-02-2025) நடைபெற்ற விழாவில், NSC-யின் தலைவரும் நிர்வாக இயக்குநருமான டாக்டர் மணிந்தர் கவுர் திவேதி, வேளாண்மை மற்றும் விவசாயிகள் நலத்துறை அமைச்சர் ஸ்ரீ சிவராஜ் சிங் சவுகானிடம் ஈவுத்தொகை காசோலையை வழங்கினார்.
விவசாயிகளுக்கு தரமான விதைகள்:
உற்பத்தித் துறையில், NSC அதன் திறன்களை தொடர்ந்து மேம்படுத்தி வருகிறது, மூல விதை உற்பத்தி/கொள்முதல் 17.10 லட்சம் குவிண்டாலை எட்டியுள்ளது. உள்கட்டமைப்பு மேம்பாடுகளால் விதை பதப்படுத்தும் திறன் 25.67 லட்சம் குவிண்டாலாக அதிகரித்துள்ளது.
2023-24 நிதியாண்டில், NSC அதன் நிதி செயல்திறனில் குறிப்பிடத்தக்க வளர்ச்சியைப் பதிவு செய்தது. செயல்பாடுகளிலிருந்து கிடைக்கும் வருவாய் முந்தைய ஆண்டில் ₹1,078.23 கோடியிலிருந்து ₹1,143.26 கோடியாக அதிகரித்துள்ளது, அதே நேரத்தில் மொத்த வருமானம் 2022-23 ஆம் ஆண்டில் ₹1,112.13 கோடியுடன் ஒப்பிடும்போது ₹1,182.48 கோடியாக (எப்போதும் இல்லாத அளவுக்கு) அதிகரித்துள்ளது.
ஈவுத்தொகை வழங்கும் நிகழ்வில் பேசிய மத்திய அமைச்சர் ஸ்ரீ சிவராஜ் சிங் சவுகான், விவசாயிகள் எப்போதும் நல்ல தரமான விதைகளைப் பெறுவதை உறுதி செய்ய வேண்டும் என்று கூறினார். இந்த பணியில் தேசிய விதைகள் கழகம் முன்னணிப் பங்கு வகிக்க வேண்டும் என்று ஸ்ரீ சவுகான் வலியுறுத்தினார். இந்த நிகழ்வில், செயலாளர் ஸ்ரீ தேவேஷ் சதுர்வேதி, இந்திய அரசின் வேளாண்மை மற்றும் விவசாயிகள் நலத்துறையின் இணைச் செயலாளர் (விதை) ஸ்ரீ அஜீத் குமார் சாஹு மற்றும் NSC மற்றும் வேளாண் அமைச்சகத்தின் மூத்த அதிகாரிகளும் கலந்து கொண்டனர்.
தேசிய விதைகள் கழகத்தின் பின்னணி:
NSC என்பது இந்திய அரசாங்கத்தால் வேளாண்மை மற்றும் விவசாயிகள் நல அமைச்சகத்தின் நிர்வாகக் கட்டுப்பாட்டின் கீழ் உள்ள ஒரு அட்டவணை 'B'-மினி ரத்னா வகை-I நிறுவனமாகும். 1963 ஆம் ஆண்டு நிறுவப்பட்ட NSC, இந்தியாவில் விவசாய உற்பத்தித்திறனை மேம்படுத்தவும் உணவுப் பாதுகாப்பை உறுதி செய்யவும் சான்றளிக்கப்பட்ட விதைகளை உற்பத்தி செய்து விநியோகிப்பதில் ஈடுபட்டுள்ளது.
ராஜஸ்தானில் உள்ள சர்தார்கர், சூரத்கர், ஜெட்சர், ஹரியானாவில் உள்ள ஹிசார் மற்றும் கர்நாடகாவில் உள்ள ராய்ச்சூர் ஆகிய ஐந்து பெரிய பண்ணைகளில் NSC விதைகளை உற்பத்தி செய்கிறது. மொத்தம் 21,841 ஹெக்டேர் பரப்பளவிலும், 14,166 பதிவுசெய்யப்பட்ட விவசாயிகள் மூலமாகவும் இது விதைகளை உற்பத்தி செய்கிறது.
இந்த நிறுவனம், இனப்பெருக்க விதைகள் முதல் அடிப்படை விதைகள் முதல் சான்றளிக்கப்பட்ட விதைகள் வரை, காலவரிசைப்படி சோதனை விதைகளை உற்பத்தி செய்கிறது. இந்த நிறுவனம் 11 பிராந்திய அலுவலகங்கள், 48 பகுதி அலுவலகங்கள், 29 உற்பத்தி மையங்கள், 75 விதை பதப்படுத்தும் தொழிற்சாலைகள், 7 குளிரூட்டப்பட்ட விதை சேமிப்பு வசதிகள் மற்றும் 180 விதை சேமிப்பு கிடங்குகளைக் கொண்டுள்ளது.
80 வகையான பயிர்கள் மற்றும் தானியங்கள், எண்ணெய் வித்துக்கள், பருப்பு வகைகள், தினை, தீவனம், நார், பசுந்தாள் உரம் மற்றும் பரந்த அளவிலான காய்கறிகள் அடங்கிய 900 வகைகள்/கலப்பினங்கள், சிட்ரஸ், மாதுளை, கொய்யா, மாம்பழம், நெல்லி, அலங்கார மற்றும் வனவியல் மரக்கன்றுகள்/தாவரங்கள் போன்ற பழ பயிர்களின் மரக்கன்றுகளும் NSC மூலம் உற்பத்தி செய்யப்படுகின்றன.
அனைத்து NSC விதைகளும் பெரும்பாலான நடவுப் பொருட்களும் Open Network for Digital Commerce (ONDC) இல் கிடைக்கின்றன என்பது குறிப்பிடத்தக்கது.
Read more:
வேளாண் தொழில் முனைவோருக்கு குட் நியூஸ்- StartupTN உடன் COXBIT புரிந்துணர்வு ஒப்பந்தம்
கோனோகார்பஸ் மரத்திற்கு போட்டாச்சு தடை- இவ்வளவு தீமையா இந்த மரத்தால்?
Share your comments